सुत्केरी महिलालाई स्वास्थ्य संस्थामै खानाको व्यवस्थापन 

कालिकोट जिल्लाको पचालझरना गाउँपालीकाले सुत्केरी महिलालाई स्वास्थ्य संस्थामै खानाको व्यवस्थापन गरेको छ । गाउँपालीकाको राम्नाकोट स्वास्थ्य चौकीमा सुत्केरी र गर्भवती महिलाहरुका लागि प्रसुती गृहमा आवासीय व्यवस्थापन गरिएको हो । सुत्केरी महिलाहरुका लागि प्रसुती सेवामा स्वास्थ्यकर्मीबाट सेवा प्रवाहमा सहजता कायम गर्न र सेवाग्राहीलाइ दुःख नहोस भनेर स्वास्थ्य संस्थामा उचित व्यवस्थापन गरेको जनाएको छ ।

स्वास्थ्य चौकी राम्नाकोटका डा. धिरज शाहले भौतिक संरचनाको अभाव भएपनि भौगोलिक बिकटताका कारण बिरामी र सुत्केरी महिलाहरुले झोलामा रोटी बोकेर रुखको छहारीमा बसेर खाना खाएको देखेर बिरामी र कुरूवाका लागि घरबाट अर्गानीक चामल र दाल मात्रै लिएर आउनु अनुरोध गरेको बताए । उनले भने “हामीले तेल, नुन र अन्य कुराहरूको जोहोको लागि हामी पालिका सरकार सँग आग्रह गरे संगै स्वास्थ्य शाखाको अनुरोधमा पचालझरना गाउँ पालिकाले प्रसुती सेवाका लागि १ थान ग्यास चुलो, प्रेस कुकुर सहित थालीको ब्यबस्थापन गर्दा उक्त सेवा दिन सहज भएको हो ।

सुत्केरी र गर्भवती महिलालाई सहज भएको यस कार्यले राम्रो सन्देश दिएको स्वास्थ्य शाखा प्रमुख बिरेन्द सँज्यालले बताएका छन।संज्यालले भने “हामीले जस्तो सुकै बिरामीको लागि भिडियो एक्सरेबाट पनि सेवा दिएको बताइएको छ ।” एक्सरे मेसिन आफूसँग भएपनि दक्ष जनशक्तिको अभाव रहेको बताउँदै सहि कुराको गहिराइमा नपुगेर आलोचना हुने गरेको प्रति दुःख व्यक्त गर्दै स्वास्थ्य संस्थामा सेवा लिन दिन तालमेल मिलाउदै अघि बढेको दाबि गरेका छन् । यस अघि सुत्केरी हुन नसकेका बेला पचालझरना ९ निवासी एक जनाको हेलिकप्टरबाट उद्धार गरी ज्यान जोगाइएको थियो ।