कालीकोट
हेलिकप्टर मार्फत सुत्केरी महिलाको उद्धार गरिएको छ । जिल्लाको सान्नीत्रिवेणी गाउँपालिका ४ की २० वर्षीया लक्ष्मी शाहीलाई शुक्रबार हेलिकप्टरबाट उद्धार गरी प्रदेश अस्पताल सुर्खेत लगिएको बताईएको छ । गत वैशाख ८ गते मेहलमुडी स्वास्थ्य चौकीमा सुत्केरी भएकी शाहीको स्वास्थ्य कमजोर हुँदै गएपछि जिल्ला अस्पताल मान्म ल्याइएको थियो। शाहीको शरीरमा अक्सिजनको मात्रा न्यून भई स्वास्थ्य अवस्था जटिल देखिएपछि उनलाई हेलिकप्टरबाट उद्धार गरी सुर्खेत लगिएको स्वास्थ्य सेवा कार्यालय कालिकोटका जनस्वास्थ्य अधिकृत कटक महतले बताउनु भएको छ । मुटुमा समस्या देखा परेकाले उनको यता उपचार सम्भव नभएपछि सुर्खेत पठाइएको हो ।
प्रमुख जिल्ला अधिकारी गणेश नेपालीको समन्वयमा थप उपचारका लागि राष्ट्रपति महिला उत्थान कार्यक्रममार्फत हेलिकप्टर मगाएर प्रदेश अस्पताल सुर्खेतमा लगिएको छ। बच्चा जन्मिसकेको तर मुटुमा समस्या देखा परेका कारण कालीकोटमा उपचार गर्न सम्भब नभएपछि सुर्खेत लगिएको छ ।
दुर्गम हिमाली तथा पहाडी क्षेत्रमा ज्यान जोखिममा रहेका आर्थिक विपन्न गर्भवती र सुत्केरी महिलाहरुको लागि राष्ट्रपति महिला उत्थान कार्यक्रम बरदान सावित भएको छ । दुर्गम क्षेत्रमा ज्यान जोखिममा परेका गर्भवती तथा सुत्केरी महिलाहरुको लागि हवाई उद्धार कार्यक्रमले धेरैको ज्यान बचाई सकेको छ ।
तिलाप्रेस । २१ बैशाख २०८१, शुक्रबार २०:४३