जगन्नाथको नीति तथा कार्यक्रम ,किसानलाई ५० प्रतिशत अनुदान, विद्यार्थीको भर्ना शुल्क फ्री

जिल्लाको जगन्नाथ गाउँपालिकाले आर्थिक वर्ष २०८०।०८१ को नीति तथा कार्यक्रम सार्वजनिक गरेको छ । पालिकाले आगामी वर्ष गर्ने काम र योजना सहीतको ७२ बुँदाको नीति तथा कार्यक्रम सोमबार सार्वजनिक गरेको हो । गाउँपालिकाको १३ औँ बैठक मार्फत पालिका अध्यक्ष कालीबहादुर शाहीले नीति तथा कार्यक्रम प्रस्तुत गर्नुभएको हो । पालिकाका तर्फबाट गएको साउन देखि सञ्चालन गरेका गतिविधी र उपलब्धी पनि सोही अवसरमा सार्वजनिक गरेको छ । पालिकाले ७ वटा नयाँ कार्यविधी पनि पारित गरेको छ । गाउँपालिकाले यो वर्ष कृषि उत्पादन र भौतिक पूर्वाधार विकासलाई नै पहिलो प्राथमिकतामा राखेर नीति तथा कार्यक्रम सार्वजनिक गरेको प्रमुख प्रशासकीय अधिकृत रवीन्द्र बहादुर शाहीले बताउनुभएको छ । आगामी असार १० गते हुने गाउँ सभामा प्रस्तुत हुँने कार्यक्रमलाई आधार बनाएर बार्षीक नीति तथा कार्यक्रम ल्याएको अधिकृत शाहीको भनाई छ ।

पालिकाले प्रविधिबाट खेती गर्ने किसानलाई ५० प्रतिशत अनुदान सहयोग गर्ने नीति अघि सारेको छ । परम्परागत कृषि खेती प्रणालीले समय खर्च हुने र उत्पादन श्रम अनुसार गर्न नसकिने भएकोले पालिका भित्र कृषि खेतीलाई प्रविधिसँग जोड्ने गरी अनुदान कार्यक्रम ल्याएको हो । एक घर, एक करेसा बारी कार्यक्रमलाई यो वर्षपनि निरन्तरता दिएको छ । भने फलफूल र दलहन बालीलाई प्राथमिकतामा राखेको छ । कृषकहरुलाई बीउ बिजन अनुदान दिने, स्याउ कागती ओखर, लगायतका बालीलाई पकेट क्षेत्रका रुपमा विकास गर्ने र उन्नत जातको उत्पादनका लागि कृत्रिम गर्भाधान तथा नश्ल सुधारको कार्यक्रम गर्ने नीति लिएको छ ।

पालिकाले यो वर्ष अध्यक्ष रोजगार कार्यक्रम पनि ल्याएको छ । पालिका भित्रका ६ वटा वडाका ३ सय जना युवालाई काम दिने गरि ५० दिनको अध्यक्ष रोजगार कार्यक्रम सुरु गर्ने नीति लिएको छ । पालिकाले कृषि, पर्यटन र जडीबुटी र जलश्रोतमा लगानी बढाउने नीति लिएको उपाध्यक्ष मरुकला बिष्टले बताउनुभएको छ । पालिकाले कक्षा ११ र १२ मा पढ्ने विद्यार्थीका लागि कुनै प्रकारको भर्ना वा अन्य कुनै शुल्क नलिने, मावि तहका लागि थप शिक्षकको व्यवस्था गर्ने र गाउँ स्वयम सेवक शिक्षक बढाउने नीति लिएको छ ।दक्षयुवा जनशक्ति उत्पादन गर्न युवाहरुका लागि सिप मुलक तालिम सञ्चालन गर्ने र त्यसका लागि पछिल्लो समय बजारमा माग भएका कामलाई ध्यानमा राखेर तालिम दिने नीति लिएको छ । खाली ठाउँमा वृक्षारोपण गरिने छ । हराबरा पालिका बनाउने लक्ष्यलाई निरन्तरता दिएको छ ।