पलाँतामा सिटामोल अभाव

कालिकोट कालिकोटको पलाँतामा रहेको १५श्याको अस्पतालमा सिटामोल अभाव भएको छ। पलाँता अस्पतालमा औषधि अभाव भएपछि उपभोक्ताले सास्ती खेप्नु परेको छ।जिल्लाको दुर्गम भेगमा रहेका नागरिकलाई मध्यनजर गरि अघिल्लो सरकारले स्थापना गरेको १५ श्याको पलाँता अस्पतालमा औषधि अभाव भएको स्थानीयले बताएका छन्।

पलाँता अस्पतालमा औषधि लिन जाँदा आफूले औषधि अभावले रितै फर्किएको स्थानीय हर्षबहादुर बमले बताए। ‘राम्रो उपचार हुन्छ होला भनेर अस्पताल पुगेको अस्पतालमा त सिटामोल अभाव रहे छ। उनले भने, ‘नयाँ जनप्रतिनिधिले स्वास्थ्य र शिक्षा क्षेत्रमा चासो दिएनन्। ‘गाउँपालिका अध्यक्ष काठमान्डौं घुम्न गएका छन्। पालिकामा बेथिति सुरु भैसक्यो। विद्यालय बन्द छन्। अस्पताल र स्वास्थ्य शाखामा औषधिको अभाव छ। कर्मचारी नियमित छैनन्। सरकारि मोटरसाईकलमा पसलको सामान खरिद हुन्छ।’

अस्पतालमा म्याद सकिएको औषधि मात्र रहेको निवर्तमान अध्यक्ष लक्ष्मणबहादुर बमले बताए। यस विषयमा पलाँता गाउँपालिका अध्यक्ष विष्णु रोकायाले आफू पालिका बाहिर रहेको बताए। उनले भने, ‘औषधिको अभाव भएकै हो। हामीहरु खरिद प्रक्रियामा छौं। केहीदिनमा औषधि पुग्छ।’