समयमा उपचार नपाउँदा हुम्लामा सुत्केरी महिलाको मृत्यु

समयमा उपचार नपाउँदा हुम्लामा एक सुत्केरी महिलाको मृत्यु भएको छ । मृत्यु हुनेमा जिल्लाको अदानचुली गाउँपालिका– ५ काँखे भन्ने गाउँका किसान शाहीकी श्रीमती रङ्गिता शाही रहेकी छन् । यद्यपि जन्मिएको शिशुको भने अवस्था सामान्य रहेको सोही वडाका वडाअध्यक्ष कमल बहादुर छत्यालले रातोपाटीलाई जानकारी दिए ।

सोमबार बिहानै बेथा लागेर दोस्रो सन्तानको रुपमा छोरीलाई जन्म दिएकी उनको लामो समयसम्म साल नझरेको र रक्तश्राव भइरहेको थियो । ‘तर गाउँ नजिकै स्वास्थ्य चौकी नभएकाले उनले उपचार पाइनन्,’ छत्यालले भने,‘ मंगलबार बिहान उज्यालो होला र स्टेचरमा बोकेर स्वास्थ्य चौकी लैजाउँला भन्दाभन्दै उनको मृत्यु भएको सुन्नामा आएको छ ।’

छत्यालका अनुसार रङ्गिताको घरदेखि स्वास्थ्य संस्थामा पुग्न एक घण्टा भन्दा बढी समय लाग्छ । त्यो पनि डाँडाकाँडाहरू छलेर स्टेचरमा बोकेर लैजानुपर्ने वाध्यता छ । रङ्गिताको यसअघि पनि ३ वर्षकी छोरी रहेको उनले बताए । यहाँ सामान्यतः अस्पताल गएर सुत्केरी गराउने चलन छैन,’उनले भने,‘ बिरामी भएको लामो समयसम्म पनि आवश्यक केयर नभएकाले उनको मृत्यु भएको हुनसक्छ ।’