अझै खुलेन अवरुद्ध कर्णाली करिडोर

कार्तिक १३ कालिकोट गत असोज १९ गतेको पहिरोका कारण अवरुद्ध कर्णाली करिडोर अझैं खुल्न सकेको छैन । करिडोर अन्तर्गत सान्नी त्रिवेणी गाउँपालिका(१ को लुसामा निरन्तर पहिरो खस्दा कर्णाली करिडोर अझैं खुल्न नसकेको हो ।उक्त क्षेत्रमा अहिले पनि सुख्खा पहिरो खरिरहेको छ ।

करिडोर सञ्चालन नहुँदा कालिकोट, बाजुरा, मुगु र हुम्ला दैनिक उपभोग्य सामान ढुवानीमा समस्या आएको छ । निरन्तरको पहिरोका कारण सडक सञ्चालन गर्न सकिएको छैन निशान्त निर्माण सेवा कम्पनीका प्रोप्राइटर प्रमुख अनन्त बरालले भने, स्काभेटर पहिरो खसेको स्थलमा छन् तर काम गर्न सकिएको छैन ।

खुलालुदेखि हुम्लासम्मको सडकखण्ड अवरुद्ध हुँदा कालिकोट, बाजुरा, मुगु र हुम्लामा खाद्यान्न अभाव हुँदै गएको कालिकोट रास्कोट नगरपालिका–५ स्युनाका रजबहादुर शाहीले बताए । कर्णाली करिडोरअन्तर्गत कालिकोट जिल्लामा ४० किलोमिटर सडकखण्ड, बाजुरामा जिल्लामा ४३ किलोमिटर र हुम्ला जिल्लामा एक सय १३ किलोमिटर छ ।