जुम्ला दसैँ र तिहारलाई लक्षित गरी जुम्लामा सञ्चालित सहुलियत पसलले जुम्ली विपन्न नागरिकलाई राहत भएको छ । बजारमा महँगी बढ्दै गएको र खाद्य व्यवस्था तथा व्यापार कम्पन्नीले विगतमा दिँदै आएको मूल्यभन्दा प्रतिकेजी ७ रुपैयाँ छुट दिँदा जुम्ली विपन्न नागरिकले राहत पाएका हुन् । जुम्लामा असोज १ गतेबाट सहुलियत पसल सञ्चालनमा छन् ।
पातारासीकी विष्णुमाया एैडीले बजारमा महँगी बढिरहेको समयमा सस्तोमै दाल चामल पाउँदा राहत मिलेको बताउनुभयो । विष्णुमाया जस्तै जुम्लाका सयौँ विपन्न नागरिकले सहुलियत पसलबाट राहत मिलेको बताउनुभयो ।
आइतबार मात्रै सहुलियत पसलबाट जुम्लाका ४ सय जना नागरिकले चामल लिएका छन् । खाद्यान्नमा छुट पाएपछि एकै दिन आइतबार अहिलेसम्मकै धेरै नागरिकले चामल लिएका हुन् ।
खाद्य व्यवस्था तथा व्यापार कम्पनी जुम्ला शाखाका प्रमुख निर्मल विष्टले सहुलियत पसलले विपन्न नागरिकलाई थोरै भएपनि राहत पुगेको बताउनभुयो । “आइतबार एकै दिन चार सय जनाले झण्डै १ सय ५० क्वीईन्टल चामल लिएका छन् । ६ प्रकारका चामल र ३ प्रकारको दालमा प्रतिकेजी ७ रुपैयाँ छुट दिइएको छ । छुटको मूल्यले टाढाबाट आउनेलाई भाडासम्म बच्छ ।”
प्रमुख विष्टका अनुसार सहुलियत पसल सञ्चालनका लागि १ हजार २ सय क्वीईन्टल चामल स्वीकृत भएको छ । आगामी कार्तिक १५ गतेसम्म सहुलियत पसल सञ्चालन हुने छ । उपभोक्ताको चाप बढी रहेकोले चामल सकिएकै दिनदेखि सहुलियत पसल स्वतः बन्द हुने उहाँको भनाई छ ।
बास्तमती चामल,अरुवा मोटो चामल,अरुवा मध्यम चामल,सोना मन्सुली चामल,स्टिम जिरा मसिनो चामल र मकवानपुर चामल तथा मासको दाल,अलहरको दाल र मुसुरोको दाल प्रतिकेजी ७ रुपैयाँ छुट दिँदा विगतको भन्दा २ सयदेखि साढे दुई रुपैयाँ नागरिकले छुट पाएका छन् । चामल लिन बढी पातारासी,गुठिचौर र चन्दननाथका नागरिक आउने गरेका छन् ।
दसैँ तिहारमा खाद्यान्न अभाव नहुने
नजिकिँदै गरेको दसैँमा जुम्लामा खाद्यान्न अभाव नहुने भएको छ । चालु आवमा जुम्लाका लागि ६ हजार क्वीईन्टल चामल स्वीकृत भएको छ । जसमा हालसम्म १ हजार २० क्विनटल ढुवानी भइसकेको छ ।
दसैँ तिहारका लागि मात्रै ९ सय ७० क्विनटल खाद्यान्न मौज्दात रहेको खाद्य व्यवस्था तथा व्यापार कम्पनी जुम्लाका प्रमुख निर्मल विष्टले जानकारी दिनुभयो । उहाँले भन्नुभयो,“दसैँ तिहारमा चालम अभाव हुन्न । कारागारदेखि आम नागरिकलाई पुग्ने गरी मौज्दात गरेका छौ ।”
जुम्लाकोट डिपोका लागि हाल १ हजार क्विनटल चालम स्वीकृत भइसकेको छ भने धापा डिपोको टेण्डर गर्दा कसैको परेको छैन । जुम्ला शाखाले पनि चामल ढुवानीका लागि टेण्डर आह्वान गर्दा कसैको नपरेको पछि पुनः टेण्डर गर्ने तयारी गरिरहेको छ ।
प्रमुख विष्टले थप्नुभयो,“पहल नगरेको भए जुम्लामा दशैतिहारमा चामलको हाहाकार हुन सक्थ्यो । तर बेलैमा समन्वय गरेर ९७० क्वीइन्टल चामल मौज्दात छ । खाद्यमा आउने सबैलाई नदोहोरिने र नछुट्ने गरी चालम वितरण गरिने छ ।”
उता डोल्पा काइगाउँ डिपोका लागि ५ सय क्विनटल र सर्मी डिपोका लागि ७ सय ५० क्विनटल स्वीकृत भई ढुवानी प्रक्रियामा रहेको छ ।कर्णाली पोष्ट दैनिक बाट सभार
तिलाप्रेस । ४ आश्विन २०७९, मंगलवार ११:४६